ROXAS CITY, CAPIZ- Dalayon na nga ginpasakaan sang kaso nga indirect contempt sanday Akbayan Party-list Representative Percival “Perci” Cendaña kag political analyst Richard Heydarian bangud sa ginaalegar nila nga “deliberate, malicious, and scandalous public attacks” batok sa Korte Suprema.
Sa interview sang Bombo Radyo Roxas kay Atty. Rolex Suplico, Board Member sang 5th District of Iloilo, ginkumpirma sini ang pag-file nila sang kaso ni Atty. Mark Tolentino kasunod sang desisyon nga ginpaguha sang Korte Suprema sang Hulyo 25 nga gindeklara nga unconstitutional ang gin-file nga articles of impeachment batok kay Bise Presidente Sara Duterte.
Suno kay Atty. Suplico, obligasyon nila nga depensahan ang integridad sang Korte Suprema bilang mga opisyal sang korte. Dugang pa sini, tion madula ang kredibilidad sang Supreme Court, madula man ang hustisya sa pungsod rason nga bilang mga abogado kag Pilipino, obligasyon nila nga ipakigbato ang kahilwayan kag paging patas sang Kataas-taasan nga Hukuman.
Si Representative Cendaña ang isa sa apat nga nag-file sang impeachment complaint batok kay Duterte, apang ginbasura ini sang Korte Suprema sa basehan nga naglapas ini sa one-year rule kag kulang sa due process. Samtang, si Heydarian ang ginkasuhan bangud sa ginaalegar mapanira nga post sa social media kun sa diin ginsambit sini nga si anay Presidente Rodrigo Duterte ang nag-appoint sa 13 sa 15 nga sa karon mahistrado sang Korte Suprema.
Nagapati sanday Tolentino kag Suplico nga ang mga pahayag sang duwa ang nagapakita sang pagpangbastos kag pagpang-guba sa reputasyon sang pinakamataas nga hukuman sa pungsod. Ginalauman nga magaatubang sanday Cendaña kag Heydarian sa korte kaangot sang kaso nga gin-file batok sa ila.
Interviewed by Bombo Daren Salomeo Henson
