Ginhingadlan ni former Ako Bicol Rep. Zaldy Co si former House Speaker Martin Romualdez nga amo ang ginaalegar nagpahog sa iya nga patyon siya kun magpaguwa siya sang mga rebelasyon.
Sa ikatlo nga bahin sang video statement nga ginpaguwa ni Co kahapon nga adlaw sang Domingo, ginpahayag sini nga nagsugod ang mga pamahog batok sa iya sang Marso 2025 sa isa ka pagsinapol.
Suno sa iya, gintawgan siya ni Romualdez nga indi na magpauli kag atipanon nila siya. Apang liwat nga nagtawag si Romualdez matapos ginhambalan si Co nga delikado kun magpauli ini sa Pilipinas.
Dugang pa Co, mahimo nga mag-hire sila sang tawo nga mag-kidnap sa iya ukon mag-hire sang pulis nga patyon siya samtang yara siya sa prisuhan.
Nahibaluan nga una na nga ginpahayag ni Co nga plano sini nga magpauli sa Pilipinas pagkatapos sang State of the Nation Address (SONA) ni Presidente Ferdinand Marcos Jr. apang sang mapauli na siya kuntani, gintawgan siya ni Romualdez kag ginsilingan nga indi na magbalik sa pungsod kag nagpasalig nga atipanon siya suno sa mando sang Presidente.
Apang sang ulihi wala galaum si Co nga gamiton lang siya nga tabon sa kampanya sang administrasyon kontra korapsyon.
Samtang wala pa sang pahayag si Romualdez kaangot sa mga rebelasyon nga ginpaguwa ni Co.
