ROXAS CITY – Wala sang kamatuuran ang mga alegasyon nga ginahaboy sang pila ka mga pumuluyo sa isa ka barangay sa banwa sang Mambusao batuk sa katapo sang Philippine Army.
Sa interview sang Bombo Radyo kay Lt. Col. Jay Javines tagpamaba sang 3ID Philippine Army, ginpahayag sini nga indi ini nila buluhaton nga mga suldado kundi ang pagbulig kag pagprotekta sa mga tawo.
Suno kay Javines, pananglitan nga may gid man sang mga pumuluyo ang naka-eksperyensya sini mahimo nga ireport ukon magpablotter sa kapulisan agud mahatagan ini sang pagtamud bangud ang kaangay sini nga buluhaton wala nila ginakonsiderar.
Mahimo man suno diri nga mag-file sang kaso ang mga pumuluyo kung sa ila pamatyagan, nalapakan na ang ila kinamatarong bilang isa ka indibidwal.
Pagklaro pa ni Javines nga mahimo magpadulong sa ila talatapan kag updon ang ila punong barangay agud mahinalaan kag mahatagan sang nagakaigo nga pagtamud ang mga alegasyon nga ginahaboy batuk sa ila.
