Natalana nga mag-atubang sa Senado si dismissed Bamban, Tarlac Mayor Alice Guo subong nga adlaw sang Lunes, Septyembre 9.
Ginalauman nga takna alas-8:00 sa aga magahalin ang convoy ni Guo halin sa custodial facility sang Camp Crame padulong sa Pasay City.
Suno kay Philippine National Police (PNP) spokesperson PCol. Jean Fajardo, nakahanda na ang security convoy para sa dismissed mayor, mga babayi nga pulis ang maga-escort sa iya, may SWAT ukon special weapons and tactics personnel kag may iban pa gid nga security vehicle nga magasunod sa mga ini.
Magasuksok naman sang bulletproof vest kag posas si Guo kun magpadulong sa Senado agud nga mangin resource person sa nagapadayon nga imbestigasyon sa iligal nga operasyon sang Philippine Offshore Gaming Operators (POGOs).
Kabahin ini sang pagpreparar suno kay Fajardo bangud indi dapat pagpabungol-bungulan ang ginaalegar ni Guo nga may death threat ini nga nabaton.
Ini man ang kasunod sang mandu sang Tarlac Regional Trial Court Branch 109 nga dapat may nagakaigo nga security para sa mga tawo nga napaidalom sa jurisdiction sang korte.
Nagpakig-angut naman ang kapulisan sa Office of the Sergeant-at-Arms sa Senado halin sang Biyernes kag magasunod ang PNP kun magsiling ang Senado nga kakasan na sang posas si Guo kadungan sang inquiry.
Ginalauman nga pagahinalaan sa Senado subong nga adlaw ang P7 billion nga gingamit bilang capital sa POGOs sa Central Luzon kag amo man ang pagpalagyo ni Guo kun sa diin ginaalegar naggamit pa ini sang doppelgänger ukon ka-lookalike para nga makapalagyo ini sa mga otoridad.
