ROXAS CITY – Ginpasiguro sang Local Government Unit (LGU) sang banwa sang Dumarao, Capiz nga hugot nila nga ginatutukan ang seguridad sang mga pumuluyo kadungan sang pagpositibo sa COVID-19 sang masobra 100 ka mga pumuluyo sa syudad sang Passi, Iloilo.
Ini ang ginpahayag ni Dumarao Mayor Edgardo Arancillo sang mainterview sang Bombo Radyo Roxas.
Suno kay Arancillo, nagapatigayon sila sang istrikto nga pagrekorida sa 33 ka mga kabarangayan nga sakup sang banwa sang Dumarao bilang kabahin sang pagpabilin nga malayo sila nga malatnan sang nasambit nga balatian ilabi na kag malapit ang amo nga banwa sa Passi City, Iloilo.
Ginpahayag pa sang alkalde nga ginadumilian sa karon ang pagpadulong sang mga pumuluyo sang nasambit nga banwa agud magpaninda sa bahin sang Passi, Iloilo kag kadungan sina amo ang pag-obliga nga pagsuksok sang facemask sa tion nga magguha sa pampubliko nga lugar.
Gindugang pa sini nga wala sang border restrictions ang banwa sang Dumarao sa tion nga magsulod ang mga residente sang probinsya sang Iloilo.
Ginkumpirmar man ni Arancillo nga may yara sang mga residente sang nasambit nga banwa nga nagatrabaho sa bahin sang Passi City kabangdanan nga hugot ang ginapatigayon nila nga pagmonitor agud mapabilin nga hilway sa makamamatay nga COVID-19.
Mahibaluan nga may kabug-usan nga 33 ka mga kumpirmado nga kaso sang COVID-19 ang banwa sang Dumarao kun sa diin 6 diri ang aktibo nga kaso, 25 na ang nakarekober kag 2 ang ginbawian sang kabuhi.
