ROXAS CITY – Maisog nga ginsabat sang alkalde sang banwa sang Mambusao, Capiz ang mga alegasyon nga ini ang magatal-os sa plano nga pagpadalagan bilang gobernador sa 2022 Election ni Second District Congressman Fredenil “Oto’’ Castro.
Gintawag ni Mayor Leodegario “Jun” Labao Jr., nga wala sang pulos ang amo mga nagalapta nga istorya.
Ginpahayag pa sini nga wala sila makaistorya ni Castro sumugod nga ini ang nagpauli sa probinsya kabangdanan nga wala sang kamatuuran ang mga alegasyon nga magaupod nalang sila sa isa ka grupo.
Ginhangkat pa sini si Casto nga untaton na lamang ang pagpatigayon sini sang pagpamulitika sa mga pumuluyo.
Ginpabugal man sang alkalde nga magadaug ini kontra sa tiayon ni Castro nga si Baby Jane Castro sa tion nga ma-kontra niya ini sa pagka-Congressman sang segundo distrito.
Nagapanawagan naman ini sa mga pumuluyo nga likawan ang nagalapta nga mga istorya bangud nagapati ini nga pagpanamad ini sa tunga nila ni Governor Esteban Evan Nonoy Contreras ang nagakalatabo.
Sa pihak nga bahin, ginpasalig man sang alkalde nga sa tion nga magdaug ini, pagapun-on niya ang kakulangan ni Castro bilang bag-o nga Congressman sang segundo distrito sang probinsya.
Ginpasiguro sini ang kahandaan niya nga magpadalagan bilang Congressman bangud nangin handum sini ang pagserbisyo sang matuod sa mga pumuluyo sang probinsya.
