ROXAS CITY – Dismayado ang alkalde sang banwa sang Sigma sa mahinay nga imbestigasyon sang Ivisan Municipal Police Station natuhoy sa pagbungguanay sang ambulansya sang Sigma Disaster Risk Reduction and Management Office kag Montero Sports sa National Highway sang Barangay Ondoy, Ivisan Capiz.
Sa interview sang Bombo Radyo kay Sigma Mayor Christopher Andaya ginpahayag sini nga tuman kahinay ang imbestigasyon sang mga kapulisan kun sin-o ang may yara sang salabton sa nasambit nga insidente.
Suno kay Andaya nga klaro man nga ang Montero Sports nga ginamaneho ni Police Captain Alcer Monsera ang nagpang-agaw sang linya kag nagbunggo sa ambulansya.
Ginkalain sini sang buot sa nagalagaw nga alegasyon nga natulogan ang driver sang ambulansya nga si Darius Yap.
Suno sa alkalde nga wala natulogan si Yap bangud magasugat ini sila kuntani sang mga LSI’s sa siyudad sang Roxas.
Ginkatingala man sini nga tubtob subong wala pa natapos ang imbestigasyon sang mga kapulisan kag wala pa natumod ang dapat manabat sa insidente.
Ginpanindugan man sang alkalde nga indi si Police Captain Monsera ang driver sang nasambit nga salakyan.
Nagapati ini nga yara sa idalom sang impluwensiya sang makahulubog ang mga sakay sang Montero Sports.
Sa karon natigayon na nga mabisitahan ni Andaya ang haya sang mga napatay nga mga frontliners nga sanday Darius Yap kag Ernie Fulgencio samtang padayon pa nabulong sa ospital si John Rey Castillon.
Nagpasalig naman si Andaya sang bulig para sa duha ka napatay nga mga frontliners.
