ROXAS CITY – Napuno sang dugo ang St. Vincent Ferrer Parish Church sa Barangay Cagay, Roxas City matapos magwaras ang lalaki nga nagka-problema sa paminsaron bangud sa tuman nga kagulutmon.
Sa interview sang Bombo Radyo kay Punong Barangay Arturo Aragon, ginpahayag sini nga magasugod na kuntani ang misa nga pangunahan ni Fr. Digno Jore sang gulpi lamang nagsulod ang suspek nga si Midel Alborte, 35 anyos.
Ginpunggan pa ini nga makasulod apang nagpamilit ini kag nagpalapit sa altar nga may bitbit pa nga icepick kag stick.
Gilayon nga nagpanawag sang responde sa mga katapo sang Roxas City Police Station apang sang nakita sang suspek ang mga kapulisan, nagwaras pa gid ini.
Ginsipa sini ang pila ka mga kagamitan sa altar, ginlampusan ang pila ka imahen kag ginpangpusa ang pila ka mga kagamitan nga nagresulta man sa iya pagkapilas rason nga naglapta ang dugo.
Suno kay Aragon, masami man nagasimba sadto si Alborte sa amo nga simbahan apang posible suno diri nga nakaangkon siya sang deperensiya sa paminsaron bangud sa kagulutmon ilabi na sa karon nga nagapangatubang sa tuman nga krisis.
