ROXAS CITY – Anay na nga na preso sa New Bilibid Prison sa Muntinlupa sa kaso nga paglapas sa RA 9165 kag may mga record man sa pila ka mga barangay sa Roxas City sang pagpangawat ang natumod nga suspek nga si alyas Tanya sa pagbudol-budol sa duha ka mga food cart vendors sa People’s Park, Brgy. Baybay Roxas City.
Ini ang ginkumpirmar ni PCMS Ramil Arcangeles, Public Information Officer sang Roxas Component City Police Station sang mainterview sang Bombo Radyo.
Suno kay Arcangeles, sandig sa ginpatigayon nga imbestigasyon sang ila mga imbestigador, natukiban nga anay na nadakpan sa pagduso sang ilegal nga droga si Alyas Tanya kag natigayon man ini nga maremit sa New Bilibid Prison sa Muntinlupa apang sang ulihe nakaguha kag nagpauli diri sa Roxas City.
Dugang pa sini, may pila man ka serye sang kinawatay nga natabo sa siyudad nga si alyas Tanya kag ang grupo sini ang ginatudlo man nga may kahimuan.
Mahibaluan nga positibo nga gin-identify sang mga biktima nga si alyas Tanya ang nagpangbudol-budol sa ila matapos nga ginpakita sang mga imbestigador ang pila ka laragway nagikan sa ila nga rouge’s gallery sang mga LGBTQ members nga suspek sa mga kinawatay nga natabo sa siyudad.
Matandaan nga natigayon nga mataban sang suspek ang cellphone nga nagabalor sang P21,000 kag P900 nga cash sa mga biktima kag nagorder pa ini sang pila ka mga street food kaangay sang kikiam, dynamite, kwek-kwek, siomai kag softdrinks nga nagalab-ot naman sa P1,200 nga wala man sini ginbayaran.
Samtang, nagfile naman sang affidavit of non-interest ang mga biktima nga nagakahulugan nga indi na sila magpasaka sang kaso apang bukas sa gihapon ang Roxas City PNP nga magbulig pananglitan nga magbag-o ang ila desisyon.
Nagpanawagan naman si Arcangeles sa mga posible nabiktima man ni alyas Tanya nga magpalapit kag magkooperar sa mga kapulisan agud makahimo sang nagaka-igo nga aksyon sa pagpasaka sang kaso sa suspek.
