ROXAS CITY – Yara na sa estable nga kondisyon ang 55-anyos nga amay matapos nga ginlabo sang iya kaugalingon nga anak sa Barangay Balatucan, Panitan, Capiz.
Ginkilala ang biktima kay Gilbert Mayabason Sr., sang nasambit nga lugar.
Matandaan nga ginkaakig sang biktima ang pagpanghaboy sang bato sa iya balay rason nga nagguwa ini kag hinali na lamang nga ginlabo sang iya anak nga si Gilbert Mayabason Jr., 32-anyos sang nasambit nga lugar.
Bangud diri, nag-angkon sang pilas sa natuo nga porsyon sang abaga ang biktima.
Madasig naman nga gindala sa ospital ang biktima agud dapatan sang nagakaigo nga pagbulong.
Samtang, gilayon naman nga gindala sa istasyon sang pulisya ang nasambit nga suspek.
Ginapahayag nga yara sa idalom sang impluwensiya sang makahulubog nga ilimnon ang suspek sang natabo ang insidente.
