ROXAS CITY – Ginbali sang amay sang 2 sa napatay nga triplet ang nangin depensa sang pamunuan sang Bailan District Hospital nga nagpirma ini sa waiver nga isa lamang sa tatlo ka mga lapsag ang dalhon sa Roxas Memorial Provincial Hospital sa diin may bakante nga incubator para sa mga premature babies.
Aminado si Rilan Bataican may ginpapirma nga waiver ang nurse, apang wala ginpaathag sa iya ang kaundan sang waiver.
Suno kay Mr. Bataican, kun nahibaluan lamang sini nga ang kaundan sang waiver nga ginpirmahan sang nurse sa iya amo ang pagpasugot nga isa lamang sa triplet ang madala sa Roxas Memorial Provincial Hospital kag mabilin ang duha sa Bailan District Hospital, wala na ini kuntani nagpasugot.
Ginapanindugan man sang amay ang nauna sini nga pahayag nga may kapabayaan sa bahin sang medical staff sang nasambit nga ospital bangud wala napatay ang duha ka triplet, kun gintatap sang maayo ang mga lapsag kag nagtingwa man nga madala ini sa publiko ukon pribado man nga ospital nga may yara sang bakante nga incubator.
Nagapabilin pa sa incubator sang isa ka ospital sa Roxas City ang isa sa triplet kag nagapangayo sang bulig ang amay nga mabuligan sila pangamuyo agud makaluwas ini sa katalagman.
Desidido ang amay nga magpasaka sang kaso batuk sa natungdan nga ospital, agud maimbestigahan ang natabo nga pagpabaya sang staff sang amo nga ospital nga gintunaan sang kamatayon sang 2 sa triplet.
Nagpangabay man ini kay Dr. Ma. Celinee Bauson, ang chief of hospital sang Bailan District Hospital nga kuntani antes magbuhi sang pahayag sa kahanginan, imbestigahan ang matood nga natabo kag indi lamang magsalig sa ginhambal sang mga personnel.
