QUEZON CITY – Ginpangalanan sang Philippine Military Academy (PMA) sang Huwebes ang top-performing cadets sang Siklab-Laya Class of 2025 nga ginapangunahan ni Cadet First Class Jessie Ticar Jr.—ang anak sang isa ka shopkeeper sa Quezon City.
Si Ticar nakatapos sang summa cum laude; kag ika-apat lamang sa maragtas sang PMA nga nakaangkon sini nga kadungganan.
Suno kay PMA Superintendent Vice Admiral Caesar Bernard Valencia, mabug-at nga pagpanghangkat sa kabuhi ang gin-atubang ni Ticar lakip na ang kapigaduhon kag pag-adjust sa iya pagtuon.
Ginpakigbahin ni Ticar nga nagabaligya lamang sang ballpoint pen kag sobre ang iya iloy, samtang disabled naman ang iya amay.
Samtang, gin-anunsyo naman ni Valencia nga umpisa sa masunod nga tuig, magaduso ang PMA sang bag-o nga curriculum nga nakatutok sa teknolohiya kag depensa.
Kalakip sa mga bag-o nga subject amo ang cyber warfare, artificial intelligence, asymmetric warfare, kag drone warfare, bilang preparasyon sa moderno nga pagpanghangkat sa pungsodnon nga seguridad sang Pilipinas.
