Tuman nga kalipay ang nabatyagan sang isa sa mga madinalag-on nga nakapasar sa tinalikdan nga Licensure Examination for Teachers nga ginpatigayon sang March 23, 2025.

Sa interview sang Bombo Radyo kay Ms. Rocel Ann Valbarez, Licensure Examination for Teachers-Board Passer Ranked 6, nga anak sang mga manogpangisda nga residente sang Barangay Basiao, Ivisan, Capiz, ginpahayag nga wala sya nagalaom nga ang challenge nya sa iya nga kaugalingon ang matuman.

Dugang pa sini, apisar nga wala man sya gina-pressure sang iya ginikanan nga makuha ang Top result, sya ang nag-challenge sa iya nga kaugalingon agud nga makuha ang amu nga kadalag-an.

Para sa iya, “If you dream big like you dream becoming a topnotcher, there is a chance you will fall as a passer, but if you only dream to be a passer, there is no other place to fall with than the word “failed”, kun sa diin amu ang nagtulod sa iya agud nga mas mangin mapisan pa sa pagtuon.

Nahibaluan nga si Ms. Rocel Ann ang nagtapos sang Bachelor’s degree sa kurso nga Bachelor of Secondary Education major in Mathematics sang tuig 2024 sa Capiz State University Pontevedra Campus bilang Summa Cum Laude.

Samtang, plano sini nga magkuha danay sang Masters’ Degree antes nga magsulod sa field sang teaching.

Mensahe naman sini sa kapareho nya nga nagahandom nga mangin madinalag-on, una nga kialalahon ang kaugalingon kag indi pagkalipatan ang rason kun ngaman luyag mo nga maabot ang isa ka handom.