Ginpahayag sang isa ka political analyst nga ang mga aberya kag power interruptions sa midterm elections sa pungsod ang pamatuod nga indi pa perpekto ang sistema sang eleksyon sa Pilipinas.
Suno kay Edna Co, former Dean sang University of the Philippines National College of Public Administration and Governance, may kinalain sa kun paano ginapatigayon ang eleksyon sa mga syudad kag sa mga probinsya.
Pahayag niya nga ang mga report nahanungod sa mga balota nga naguba bangud sa mantsa sang tinta ukon mga automated counting machines nga wala nagagana ang dapat solusyonan sang Commission on Elections bilang kabahin sang “design thinking” sa panahon sang eleksyon.
Paathag sini nga ang design thinking ang nagasakop indi lamang sa disenyo sang mga makina, pulungkuan, kundi pati man sa kabug-usan sang pisikal nga palibot sang mga presinto sa eleksyon kasubong sang lokasyon kag suplay sang kuryente.
Samtang, ginpahayag ni Energy Assistant Secretary Mario Marasigan nga daku ang pagnubo sang mga kaso sang power interruptions sa adlaw sang eleksyon, halin alas 9:00 sang aga.
Ginpahayag ni Co nga ginakahangaw-an ang mga report sang kalakasan kaangut sa eleksyon sa mga lugar kasubong sang Marawi City kag Silay City, bangud mahimo man ini nga matabo sa mga suludlon nga lugar.
