ROXAS CITY – Posible magpangatubang sa patung-patong nga kaso ang anay alkalde sang banwa sang President Roxas, Capiz matapos naaresto sang mga miyembro sang Provincial Mobile Force Company kasunod sang pagpalupok sini sang armas sa Resources Services Livelihood (RSL) Center sa Barangay Cabug-Cabug, sa nasambit nga banwa.
Mahibaluan nga naka-hospital arrest sa gihapon sa karon ang anay alkalde nga si Don Ramon Locsin matapos naglain ang pamatyag sini kasunod sang pag-aresto sa iya.
Kalakip sa posible nga ipasaka nga panumbungon batuk kay Locsin amo ang Alarm and Scandal, Trespass to Government Property, Indiscriminate Firing kag Illegal Possession of Firearm.
Sa nakuha nga impormasyon sang Bombo Radyo, ginhimo nga firing range sang anay alkalde ang likod nga porsyon sang amo nga pasilidad.
Nahibaluan nga ang duta nga ginatindugan sang RSL Center ang ginapanag-iyahan sang pamilya Locsin apang ginpahanugutan sang anak ni Ramon nga si former Mayor Raymond Locsin nga patukuran ini sang amo nga pasilidad sang nagserbi ini nga alkalde sang banwa sang President Roxas.
