Arestado ang isa ka anay Barangay Kagawad, matapos gin-implementaran sang search warrant sang mga katapo sang Maayon PNP, Capiz Police Provincial Office-Provincial Intelligence Unit kag 1st Capiz Provincial Mobile Force Company sa Sitio Tawagon, Barangay. Carataya, Maayon, Capiz.
Ginkilala ang nadakpan kay alyas “Toto”, 42-anyos kag residente sang nasambit nga lugar.
Sa pagpakig-angut sang Bombo Radyo kay PMAJ. Syril Punzalan, Hepe sang Maayon PNP, ginpahayag nga natigayon nga madakpan ang amu nga persona pinaagi sa ginpatigayon nga implementasyon sang search warrant sang mga kapulisan na nasambit nga subject person.
Nakuha sa paghinakop sini ang isa (1) ka unit sang 12 gauge homemade shotgun “Pugakhang, isa (1) ka unit sang PTFA MG CO HARTFORD CONN USA DETECTIVE SPEC . 38 Special CTG caliber revolver, tatlo (3) ka mga bala sang .38 caliber kag isa (1) ka magazine sang 12 gauge shotgun.
Mahibaluan nga kaso nga paglapas sa RA 10591 ukon Comprehensive Firearms and Ammunition Regulation Act ang pagaatubangon sang nasambit nga akusado.
Sa karon, nagapabilin ini sa kustodiya sang Maayon PNP kag natalana nga i-turn over sa korte para sa nagakaigo nga disposisyon.
