ROXAS CITY – Ginakabig ni Capiz 1st District Congressman Emmanuel Billones Sr., nga malisyoso, kabutigan kag wala sang balasehan ang pagdalahig sang bagman sang Beria Drug Ring sa Negros Occidental nga si Ricky Serenio kay anay DILG Secretary Mar Roxas sa illegal drug trade sa Western Visayas.
Sa exclusive interview sang Bombo Radyo Roxas kay Congressman Billones, ginpahayag sini nga imposible ang mga akusasyon ni Serenio, bangud kilala sini si Roxas nga may maayo nga kabubut-on, sinsero kag matinlo ang konsensiya nga matapna ang iligal nga droga sa pungsod.
Gin-ako man sang kongresista nga matapos nabuyagyag ang nasambit nga balita naka-estoryahanay pa sila sang anay tiglikum sa diin ginpahayag sa iya nga ginabalewala lamang niya ang isyu bangud klaro nga politically motivated ini.
Ginapangitaan na lamang sang buho sang administrasyon si Roxas, para matum-ok ini sa mga kasal-anan nga kahimuan sang iban bangud kilala ini nga oposisyon sang administrasyon Duterte kaupod si Senator Franklin Drilon.
Nagapati man si Billones nga may daku nga personalidad nga yara sa likod sang nasambit nga isyu kag indi lamang diri magatapos ang pagdalahig sa pangalan ni Roxas bangud ini ang panugod pa lamang.
