ROXAS CITY – Nagdangat sa 87 ang numero sang mga anay miyembro sang Communist Party of the Philippines-New People’s Army (CPP-NPA) nga naka-avail na sa Enhanced Comprehensive Local Integration Program (E-Clip) sang gobyerno.
Sa nasambit nga numero 57 sa mga nagsungka ang gikan sa probinsiya sang Capiz, pito sa Iloilo kag 23 sa Negros Occidental.
Ginpahayag ni Captain Cenon Pancito III, hepe sang division affairs office kag tagpamaba sang 3rd Infantry Division Philippine Army nga madamo na nga mga anay rebelde ang nagsungka sa gobyerno matapos napamatud-an nga maayo ang programa nga gindihon sa ila sang gobyerno kag ginabuligan sila nga liwat makabalik sa normal nga pagpangabuhi nga indi na kinahanglan magdalagan kag magpanago sa kabukiran.
Nagapati ang opisyal nga pinaagi sa E-Clip program natul-id na karon sang mga anay rebelde ang pagpatalang nga ginhimo sang mga NPA agud mahaylo sila sa sala nga pagpati.
