ROXAS CITY – Naghatag sang iya nga sabat ang anay hospital management committee head sang Roxas Memorial Provincial Hospital nga si Mrs. Melanie Arancillo natuhoy sa kontrobersiyal nga pagpauntat ni Capiz governor Esteban Evan ‘Nonoy’ Contreras sa dialysis center sang nasambit nga ospital.
Matandaan nga una na nga ginpahayag sang gobernador nga ginpauntat sini ang pagpauntat sang amo nga pasilidad bangud sa natukiban nga mga kakungalan.
Bangud diri, nagbwelta si Arancillo kag naghatag sang paathag natuhoy sa operasyon sang dialysis center sa pagpanikasog sang administrasyon ni former governor Antonio del Rosario.
Suno kay Arancillo nga kun ang kapaslawan nga mapa-accredit ang rason sang bag-o nga administrasyon sa pagpauntat sa amo nga pasilidad, klaro nga gintuad sang PhilHealth sa inagurasyon nga mahimo na ini mapa-operate sa baylo nga may license to operate na gikan sa Department of Health nga sadtong Hunyo 10 pa nabaton sang ospital.
Ginsabat man ni Arancillo ang ginhambal ni Contreras nga may yara sang nagatulo sa porsyon sang dialysis center.
Suno kay Arancillo nga Hulyo 3 ginpauntat sang Contreras administration ang operasyon sang pasilidad kag Agosto 4 na may nagtulo sa sulod rason nga wala sang deperensiya antes pa man ini ginturn-over sang nagbiya nga administrasyon.
Gintawag pa ni Arancillo nga ‘bakakon’ si Contreras bangud sa nangin pahayag sini nga kasubong wala gin-abiso sa iya ang tanan nga nagakalatabo sa pagsugod sang operasyon sang dialysis center.
Suno kay Arancillo, wala makatambong si Contreras sa ginpatigayon nga turn-over ceremony sang nasambit nga pasilidad kag si provincial administrator Atty. Edwin Monares ang nagtambong tal-os sa iya.
Diri suno kay Arancillo makapamat-od ang halos tanan nga mga department heads sang kapitolyo-probinsiyal nga gindetalye niya ang tanan natuhoy sa operasyon sang nasambit nga pasilidad.
Gindugang pa ni Arancillo nga kun maayo lamang ang bag-o nga acting chief of hospital sang RMPH nga si Dr. Edmarie Magallanes Tormon, siya mismo ang nag-check sang accreditation status sang dialysis center sang ospital sa PhilHealth mangin ang license to operate kag ipalab-ot sa igdulungog ni Contreras.
