Anum ka mga banwa nga wala sang kaso sang ASF, ginatinguhaan nga masalbar batuk sa makamamatay nga sakit sang baboy

ROXAS CITY – Nagapabilin nga hilway sa African Swine Fever (ASF) ang mga banwa sang Jamindan, Mambusao, Sigma, Dao, Cuartero kag Dumalag.

Ini ang ginpahayag ni Dr. Leonel Abordo, Provincial Veterinarian sang mainterview sang Bombo Radyo.

Suno diri, ginatinguhaan nila sa karon nga indi masudlan sang baboy nga may ASF ang nasambit nga mga banwa agud indi magkulang sa suplay ang bug-os nga probinsya.

Bangud kun magalala ang sitwasyon sang ASF kag magalapta ang virus sang baboy sa Capiz, dako ini nga kapiyerdehan sa mga hog raisers kag kun matabo mapilitan ang probinsya nga mag-import sang baboy bilang konsumo.

Ginahinyo diri sa mga pumuluyo nga indi pag-ipalusot ukon pagtaguon kun may nagamasakit nga baboy sa ila lugar.