ROXAS CITY-Magapasaka sang panumbungon si Punong Barangay Einstein Okpura sa office of the ombudsman batuk sa anom sini ka mga barangay kagawad sa Barangay Inzo Arnaldo Village, Roxas City.
Ini may kaangtanan sa mga ginapangatubang nga isyu sa nasambit nga barangay kun sa diin kalakip na diri ang indi pagkasugot sa pagpili sang ila mangin bag-o nga treasurer sang ila nga barangay.
Apang, may yara sang ginpili si Okpura nga treasurer sang ila nga barangay nga amo si Regina Olivare apang indi man magpabor ang anom sini ka mga barangay kagawad.
Ini bangud may yara man sila sang nahamut-an nga mangin treasurer sang ila nga barangay nga si Nelson Aquines.
Bangud diri, wala pa sang treasurer ang ila nga barangay rason nga masobra 7 ka bulan naman nga wala sila sang kuryente kag tubig sa ila barangay hall matapos nga wala ini nabayaran humalin sang nag-resign ang ila anay treasurer.
Magluwas diri, wala pa man nakabaton sang sweldo ang ila mga tanod.
Mahibaluan nga may yara kuntani sila sang patigayunon nga session apang wala sang may nagtambong magluwas kay Barangay Kagawad Peter Talabucon.
Mahibaluan nga nagdangup sa talatapan sang DILG si Okpura kag gin-abisohan ini nga pasakaan sang panombongon ang mga kaupdanan sini nga mga barangay officials.
Sa interview naman sang Bombo Radyo sa isa ka pumuluyo sa ila nga barangay nga bangud sa mga isyu sa tunga sang mga opisyal nangin apektado naman sila kun sa diin madamo sang mga kakulangan sa ila nga barangay nga ginapabay-an lamang.
Dugang pa sini nga wala naman nagapatigayon sang session ang mga barangay official bangud wala ang mga ini nagakooperar sa isa kag isa.
Mahibaluan nga kalakip sa mga ginpasakaan sang panumbongon ni Okpura amo sanday Barangay kagawad Earvin Sicad, Loida Baticados, Norberto Belvis, Christopher Bengan, Rommel Balguma, Peter Talabucon. Richmond Alipongan kag Cyril De juan.
