PRESIDENT ROXAS, CAPIZ – Arestado ang apat ka indibidwal bangud sa pagbaligya sang armas-luthang kag paggamit sang iligal nga droga sa Sitio Toll Bridge, Barangay Poblacion, President Roxas, Capiz.
Ang arestado amo sanday, alyas Hannibal, alyas Jane, kag alyas May nga lunsay mga residente sang Sitio Toll Bridge sa nasambit nga banwa kag si alyas Policarpio, nga residente naman sang Barangay San Jose, Roxas City.
Sa interview sang Bombo Radyo kay PMAJ Alfred De Leon, Hepe sang President Roxas Municipal Police Station, iya ginpahayag nga madugay na nila gina-monitor ang subject nga si alyas Hannibal nga nabaklan sang isa ka improvised caliber .38 revolver nga may isa ka bala samtang narekober pa sa iban nga mga suspek ang mas ukon menos 15 gramos sang ginapatihan shabu nga may ginabanta nagabalor sang P102,000.00, duha ka gramos sang ginapatihan marijuana nga nagabalor sang P200.00, kag nagkalain-lain nga drug paraphernalia kasubong sang improvised tooters, foil, lighter, kag plastic sachets.
Ginpasakaan sang kaso nga paglapas sa Republic Act 10591 (Comprehensive Firearms and Ammunition Regulation Act) kag Republic Act 9165 (Comprehensive Dangerous Drugs Act of 2002) ang subject person kag subong man ang tatlo ka iban pa nga suspek nga nadakpan sa akto nga nagagamit sang iligal nga droga.
Priso subong sa President Roxas ang mga nadakpan para sa nagakaigo nga disposisyon samtang ginapreparar na ang pagpasaka sang mga kaso batuk sa ila.
