ROXAS CITY — Nadakpan sa ginpatigayon nga drug-bust operation sang pulisya ang nagpakilala apo sang alkalde sang banwa sang Mambusao kaupod ang apat ka iban pa nga suspetsado sa isa ka hotel sa siyudad sang Roxas.
Ginkilala ang mga nagkaladakpan nga subject persons sang operasyon nga sanday Gemma Mae Calinao, 24-anyos, residente sang Barangay Bago, Roxas City kag Renz Vidal, 21-anyos, residente sang Barangay Tanque, Roxas City.
Samtang nadakpan man sa akto nga nagagamit sang iligal nga droga sa isa ka hulot sang hotel si King Christian Labao, 18-anyos, residente sang Barangay Bato-Bato, Mambusao nga nagpakilala apo ni Mambusao Mayor Leodegario Labao Jr., kag mga kaupod sini nga sanday Renante Alvarez, 37-anyos, residente sang Barangay Bago kag Reginald Fresco, 18-anyos, residente sang Barangay Tanque sining siyudad.
Narekober naman sang mga katapo sang Roxas City PNP – Station Drug Enforcement Unit kay Calinao ang anum ka mga sachets sang ginapatihan shabu, P500 nga marked money kag iban pa nga drug paraphernalia.
Suno kay PSI Efren Yu-ing, pinuno sang operating unit, nadakpan na sadto sa kasubong man nga kaso si Calinao apang ini ang nahilway.
Nagapati si Yu-ing nga ginagamit sang mga arestado nga drug den ang hulot sang hotel kun sa diin sila nagkaladakpan.
