ROXAS CITY – Magapatigayon na sang santos nga misa sa mga katoliko nga sementeryo ang mga kaparian sa palaabuton nga piyesta minatay, matapos naghaluga na ang Covid-19 protocol sa probinsya.
Ini ang ginkumpirmar ni Rev.Fr. Jose Arturo Emilio Arbatin, Spokesperson sang Archdiocese of Capiz sang ma-inteview sang Bombo Radyo.
Suno diri nga sandig sa ginpapanaog sang administrador sang archdiocese nga si Msgr. Cyril Villareal, magabalik na sila sa ila mga kinaangdan nga hilikuton.
Sa Nobyembre 1 sa vesperas sang piyesta minatay ukon All Saints Day patigayunon ang pagbendisyon sa mga netsu ukon musuleo sa sementeryo katoliko.
Dugang pa sini nga sa Nobyembre 2 adlaw sang piyesta minatay, may yara nga pagahiwaton nga santos nga misa sa mga sementeryo katoliko kag mahimo man nga mag-request ang mga nagapanag-iya sang pribado nga sementeryo sa ila parokya kun luyag magpamisa.
Ginpaalinton man sini ang importansya sang pagselebrar sang piyesta minatay nga pinaagi sa aton pagpangamuyo para sa aton mga himata nga nagtaliwan na, ilabi na sa santos nga misa mabuligan naton sila nga mabatak pasaka sa langit agud nga makaupod ang aton Ginoo.
Dako man suno diri ang obligasyon naton nga mga buhi agud mabuligan ang mga kalag sa purgaturyo pinaagi sa paghalad sang aton mga pagpangabudlay kag paghimo sang mga maayo para sa ila.
Ginklaro man sini nga hinali nga may pagbag-o sa mga ginapatuman naton nga protocols ukon may ipapanaog nga mga bag-o nga pagsulundan ang IATF magasunod diri ang simbahan.
Pangabay man sini sa mga magapadulong sa mga sementeryo nga mangin pormal man sila sa ila nga mga pagabayu-on bangud ang sementeryo isa ka balaan nga lugar kag sundon sa gihapon ang mga minimum health protocols.
