ROXAS CITY – Dakop ang isa ka lalaki sa ginkasa nga buybust operation sang Regional Police Drug Enforcement Unit sa Brgy. Mongpong, Roxas City.
Sa inisyal nga impormasyon nga nakuha sang Bombo Radyo sa lugar, ginkilala ang nadakpan nga si alyas “Jan-jan”, 18-anyos nga residente sang New Road, Banica, Roxas City.
Narekober sa posisyon sang suspek ang onse (11) tanan ka sachet sang ginapatihan shabu nga may kabug-aton nga kapin 135 grams kag may standard drug price nga P918,000.00, P500.00 buybust money, P10,500.00 nga boodle money, isa ka homemade 12 gauge shutgun, isa ka magazine, 3 live ammunitions kag mga drug paraphernalias.
Suno kay “Jan-jan” nga ginsugo lamang siya ni certain “Renante” nga magdul-ong sang amo nga droga kag ginkakibot man sini nga may armas-luthang pag-abot sa lugar.
Gin-ako sini nga duha ka bulan na niya nga ginahimo ang pagdul-ong-dul-ong kabaylo sa P300 tubtob P400 nga bayad sa iya ni certain “Renante” apang wala ini nakahibalo sang umpisa nga iligal nga droga ang unod sang iya ginadul-ong bangud wala niya man suno diri ginabuksan kag ulihi na lamang sini nahibaluan.
Sa karon yara na ini sa kustodiya sang mga otoridad kag magapangatubang ini sa kaso nga Republic Act 10591 ukon Illegal Possession of Firearms kag Republic Act 9165 ukon Comprehensive Dangerous Drugs Act of 2002.
