ROXAS CITY – Wala sang armas-luthang nga ginahuptan kag indi panag-iya sang amay sang biktima ang calibre .38 nga ginhampangan sang iya 9 ka tuig nga bata nga lalaki nga aksidente maluthangan ang kaugalingon sa Sitio Arellano, Brgy. Pawa, banwa sang Panay.
Ini ang ginkumpirmar ni Punong Barangay Gilberto Bandejas, sang nasambitan nga banwa sang mainterview sang Bombo Radyo.
Suno diri, nga ba-se sa pamilya sang biktima, ginbilin lang sang iya nga abyan bangud indi man sini kinahanglan sang armas-luthang sa iya nga trabaho, bilang manugbantay sang punong.
Dugang pa sang kapitan, wala sang malain nga rekord ang amay sang biktima sa ila barangay kag wala man ini nalakip sa monitoring sa druglist kag indi man palahubog.
Tuman naman ang kasubo sang pamilya bangud sa pilas nga naangkon sang biktima.
Matandaan nga kahapon nga adlaw, aksidente nga naluthangan sang 9 ka tuig nga lalaki ang iya kaugalingon gamit ang nasambit nga pusil nga nakit-an sini sa aparador sang ila balay.
Naigu ini sa porsyon sang iya agtang nga sa karon, yara sa gihapon sa isa ka pribado nga ospital sa syudad kag padayon nga ginabulong.
Samtang, padayon ang imbestigasyon sang Panay MPS sa insidente.
