Ginpahayag sang isa sa House prosecutor nga valid sa gihapon ang articles of impeachment batuk kay Vice President Sara Duterte nga ginpasaka sa 19th Congress sat ion nga mag-abot ini sa 20th Congress.
Sa isa ka press briefing, ginpaathag sang abogado nga mamalidha nga si Manila Rep. Joel Chua nga yara sa Senado nga bilang continuing body ang bola para pamatian ang Articles of impeachment nga gin-transmit sang Kamara de Representantes sadtong Pebrero 5.
Indi man ini bag-o suno sa iya bangud natabo naman ini sa iban nga pungsod kasubong ng Amerika.
Ginsegundahan naman ni Tingog Party list Rep. Acidre ang pahayag ni Cong. Chua kag gintumod ang pag-impeach sadto sang 105th US Congress kay anay US Pres. Bill Clinton apang natabo suno diri ang impeachment trial sa masunod nga 106th Congress
Ginsambit man ni Acidre ang mga probisyon sa konstitusyon nga nagapahamtang sang mga partikular nga katungdanan sang duha ka panalgan sang Kongreso sa proseso sang impeachment.
Kun sa diin ang Kamara ang may eksklusibo nga kinamataron para mag-impeach samtang ang Senado naman ang may gahom nga pamatian ang mga kaso sang impeachment.
Bangud napadala na sa Senado ang Articles of Impeachment, ginhatagan pagtamod ni Acidre nga kinahanglan na nga tungdan sang Senado ang constitutional mandate sini.
Matandaan, gin-impeach sang Kamara si VP Sara sadtong Pebrero 5 kag ginpadala ang Articles of Impeachment sa pareho nga adlaw.
