ROXAS CITY – Makabig nga maka-alarma sa mga pumuluyo sang Barangay Dayao, Roxas City ang asud-asud nga pagkinawatay sa lugar sang damlag lang.
Sa interview sang Bombo Radyo kay Punong Barangay Wennie Batuampo, ginpahayag sini nga base sa datos nga napagkit sa ila barangay pila sa mga nabiktima sang wala pa makilan-an nga mga kawatan ang 2 ka puluy-an, 2 ka boarding houses kag 1 ka motor water pump.
Suno kay PB Batuampo, masami nga ginabiktima sang mga kawatan ang mga boarding house ilabi na pag-abot sa kagab-ihon.
Mahibaluan nga nakakuha sang nanari-sari nga nga komento kag reaksyon nagikan sa publiko ang ginpost sini sa iya social media account kung sa diin nakit-an sa akto ang pagsulod sang makawat sa isa ka kwarto sang boarding house samtang nagakatulog ang tag-iya sang cellphone.
Suno sa Punong Barangay, natigayon nga mataban sang kawatan ang P4,500.00 nga kwarta kag 1 unit sang cellphone kung sa diin ginapatihan natabo ang insidente takna alas 2:00 sang maga-aga kag ginapahayag pinaagi sa pagkakas sang jealousy natigayon nga makasulod ang suspek.
Bangud sini, nagpatigayon gilayon sang meeting ang Punong Barangay sa tanan nga mga Barangay Tanod agud hinalaan ang mga tikang nga mahimo himuon agud matapna ang kaangay sini nga insidente.
Panugyan sini sa mga pumuluyo nga indi mangin kampante kag mangin aligmat sa tanan nga butang subong man siguraduhon ang mga kagamitan kag lock sang balay sa tion nga maglakat.
