ROXAS CITY – Dako ang pagpasalamat ni Atty. Joe Villanueva nga ginpili ini sang mga pumuluyo bilang bag-o nga alkalde sa banwa sang Sapian.
Sa interview sang Bombo Radyo, suno diri confident ini nga magadaug bangud maayo sini ang tinutuyo kag wala ini naga-usar sang pagpakalain, kabutigan kag pagpatalang agud maluyagan sang mga Sapianon agud botohon.
Suno diri, mas ginpili sini nga padulungan ang mga nabukid nga parte sang banwa agud ipalab-ot ang iya tinutuyo, intesyon kag misyon nga pauswagon ang amo nga banwa.
Sa paglibot ni Villanueva, nakit-an sini nga may yara sang potential nga mangin lugar sang turismo ang pila ka mga barangay kag luyag pa sini nga i-develop bangud nagapati ini nga ang “Tourism is the will of progress” kag magabenipisyo ang madamo nga mga residente .
Nagpromisa man ini nga pagapadayun ang mga proyekto nga ginsuguran na sang anay administrasyon kun ini ang maga-paayo sa banwa kag hatagan gid sini sang importansya ang farm to market road kun sa din mas madasig nga makalab-ot sa merkado ang mga produkto sang Sapianon kun may yara sang maayo nga karsada.
Tuman man ang kalipay sang bag-o nga alkalde, bangud kadam-an sa mga nagdaug nga SB Memers ang iya kaalyado nga mangin kabulig niya sa pagbag-o sang banwa.
