ROXAS CITY – Natigayon nga ma-rescue sang mga otoridad ang isa ka babaye matapos nga nagtuyo nga maghikog pinaagi sa pagbitay sa iya kaugalingon sa Sitio Manggahan, Barangay Poblacion, President Roxas, Capiz.
Suno kay Punong Barangay Jeffry Dela Cruz, napuhag ang mga residente sa nasambit nga barangay matapos nga nagsaka sa puno sang ‘kamansi’ ang biktima nga si alyas Ella (indi sini matuod nga pangalan).
Ginhigtan ni Ella sang nylon cord ang iya nga liog nga iya man ginhigot sa sanga sang nasambit nga kahoy samtang siya ang nagatalangison.
Bangud diri, madasig nga nagresponde ang mga opisyales sang barangay kalakip man ang hubon sang President Roxas Municipal Fire Station kag Active Lutod-lutod Emergency Response Team (ALERT).
Samtang ginanegosyar sang mga otoridad kag sang pamilya nga magpanaog si Ella sa nasambit nga puno, ginsingit sang mga otoridad ang pisi nga ginhigot sang biktima kag amat-amat ini nga gingutrab.
Didto kag ginsaka sang mga otoridad ang nasambit nga babaye kag ginpapanaog.
Gilayon nga gindala sa ospital ang biktima bangud ginapatihan nga nag-inom pa ini sang bulong antes nagsaka sa puno kag nagtuyo nga magbitay.
Sa karon, indi pa matumod sang mga otoridad kun ano ang madalom nga rason sang biktima sa tuyo nga pag-utas sa iya kaugalingon nga kabuhi.
(Hungod nga gintago sang Bombo Radyo ang identity sang biktima bangud sensitibo ini nga kaso agud ma-amligad ang natungdan)
