Isa ka tumalagsahon nga insidente sa China ang nagpukaw sang debate matapos magpanukot ang isa ka babaye sa Henan province sang ginatawag niya nga “hugging fee” halin sa betrothal gift nga iya nabaton.
Ginkansela sang wala na ginhingadlan nga babaye ang pagpakasal pila ka semana antes ang wedding day nga natalana kuntani sa Nobyembre, apang luyag sini nga taguon ang kabahin sang “betrothal gift”, nga nagabalor sang 30,000 yuan ukon kabaylo sa P244,581 bilang bayad sa “hakos” kag iban pa nga galastusan.
Ang betrothal gift, ang isa ka masami nga pinamatasan sa China kun sa diin nagabayad ang pamilya sang lalaki sa pamilya sang babaye. Sa amo nga kaso, nagbaton ang babaye sang 200,000 yuan ukon kabaylo sa P1,630,360 halin sa pamilya sang iya nga fiancé.
Nagkasugot ang magtimbang nga bahin nga ibalik sang babaye ang 170,500 yuan ukon kabaylo sa P1,389,847.80 sa lalaki.
Suno sa matchmaker sang duha nga si Wan, ang babaye ang nagareklamo sa sobra ka tampad sang lalaki kag sa gamay sini nga sweldo. Ginsiling man sang matchmaker nga ang pinamatasan sang babye ang isa ka “imoral” kag “ang pinakapisli-an” sa 1,000 nga mag-asawa nga iya ginpang-match sa sulod sang isa ka dekada.
Nahibaluan nga natabo ang “paghakos” nga ginasiling sang babaye sa wedding photo shoot kun sa diin ginhingyo sang photographer sa lalaki na hakson siya.
Apisar nga tumalagsahon ang mga kaso sang pagpamalibad sang mga babaye nga ibalik ang bethrotal gift, pagkatapos kanselahon ang kasal, ang pagpangayo sang “hugging fee” ang naghatag sang bag-o nga perspektibo sa nasambit nga isyu.
