May yara pa sang ginabulubanta 60,000 km sang farm-to-market roads (FMR) nga wala pa matapos sa pungsod, suno sa Department of Agriculture (DA).
Suno kay Department of Agriculture Assistant Secretary Arnel de Mesa, magalawig sang ginabanta 20 ka tuig antes lubos nga matuman sang DA ang backlog sa mga proyekto sang farm-to-market roads bangud sa subong nga lebel sang pondo.
Dugang pa ni de Mesa, target sang farm-to-market roads network plan sang gobyerno ang kabug-usan nga 130,000 km, sa diin 70,000 km pa lang ang nahuman.
Pahayag pa ni de Mesa nga sa ginabulubanta nga 4,000 ka farm-to-market roads projects nga ginpatuman halin 2021 tubtub 2025, pito lang ang gintumod bilang “ghost projects.” Apang may mga dalan nga substandard kag kinahanglan nga kay-uhon.
Gin-ako man sang DA nga isa sa mayor nga pagpanghangkat sa pagtukod sang farm-to-market roads amo ang inconsistent funding, tuga sang anay praktis sang Department of Public Works and Highways (DPWH) nga gamiton ang pareho nga cost estimate kada kilometro, bisan pa nga magkatuhay ang lokasyon kag kondisyon sang mga proyekto.
Sa idalum sang 2026 National Expenditure Program (NEP), nag-alokar sang P33 bilyon ang gobyerno para sa farm-to-market roads projects.
