Isa ka low pressure area (LPA) ang gina-monitor sa kalayuon nga 225 kilometers north-northeast sang Pag-asa Island, Kalayaan, Palawan.
Samtang, isa ka shear line ang naga-apekto sa nasidlangan nga bahin sang Northern Luzon, samtang nagapangibabaw ang Amihan ukon Northeast Monsoon sa nabilin nga bahin sang rehiyon.
Bangud sini, lauman ang magal-umon nga kalangitan nga may pag-ulan kag mabaskog nga hangin sa mga apektado nga lugar.
Sa guwa sang Philippine Area of Responsibility (PAR), isa ka tropical depression ang nahamtang sa kalayuon nga 1,370 kilometers sa sidlangan sang Northeastern Mindanao.
May kabaskugon ini sang hangin nga nagalab-ot sa 55 kilometros por ora malapit sa sentro kag pagmadlos nga nagalab-ot sa 70 kilometros por ora.
Nagahulag ini pa-West-Northwest sa kadasigon nga 15 kilometros por ora.
Bangud sa trough ukon extension sang bagyo, ang mga probinsya sang Northern Samar, Eastern Samar, kag Dinagat Islands ang ginalauman nga maka-eksperyensya sang pag-ulan.
Ginapanugyanan ang mga pumuluyo sa sini nga mga lugar nga mangin alerto sa posible pagbaha kag pagtiphag sang duta, ilabi na sa manubo nga lugar kag nabukid nga lugar.
