Ika-lima sa mga nagapanguna nga rason sang kamatayon ang balatian nga diabetes mellitus sa pungsod Pilipinas sang 2024 sa diin nga may yara ini sang 6.3% of deaths ukon katumbas sang 31, 321 ka mga indibidwal.
Sa interview sang Bombo Radyo kay Dr. Aura Bree Dayo-Lacdao, Medical Specialist II/Endocrinologist sang Sen. Gerardo M. Roxas Memorial District Hospital, iya ginpahayag nga ang diabetes ang isa ka balatian kun sa diin nagataas ang sugar sa dugo bangud sa kulang ukon indi maayos ang paggamit sang lawas sa insulin, ang hormone nga nagakontrol sa blood sugar.
Suno kay Lacdao, may yara sang apat ka sahi sang diabetes, sa diin amo ang Type 1 Diabetes ukon ang Juvenile Onset Diabetes; Type 2 Diabetes; Gestational Diabetes kag Secondary Diabetes sa diin ang kada-isa may yara sang level of risks.
Pahayag nya, may komplikasyon ang amo nga balatian sa diin nga ang una nga gina-damage amo ang microvascular nga ginakalakipan sang mata, kidneys, kamot kag tiil.
Ang diabetes, ang nagapanguna nga rason sang pagkabulag sang mga tawo sa bilog nga kalibutan. Nagapanguna man nga rason sang kidney failure kag lower extremity amputation ukon ang pag-utod sang tiil.
Wala naman sang ginapili nga edad ang amo nga balatian, kag ang tawo nga may diabetes ang may mataas nga risgo sang stroke kag heart-attack.
Sa palaabuton nga Nobyembre 14, igaselebrar ang World Diabetes Day sa pungsod Pilipinas nga may tema nga ‘Diabetes and well-Being’ sa diin katuyuan sini nga pasangkaron ang ihibalo sang publiko natuhoy sa diabetes.
Nagpahanumdom naman ang natungdan sa publiko nga magpa-check-up sang regular, maglikaw sa mga matam-is kag matambok nga pagkaon, kag ipabilin nga aktibo ang pagpangabuhi agud malikawan ang diabetes kag mga komplikasyon nga tuga sini.
Interviewed by Bombo Jessa Mae Siman De Los Santos
