TAPAZ, CAPIZ – Gintupok sang kalayo ang balay sang mag-asawa nga senior citizen sa Barangay San Pedro, Tapaz, Capiz.
Ang tag-iya sang nasambit nga balay amo sanday Nolito Gerafusco Sr. kag Dolores Gerafusco, lunsay senior citizens kag may kaupod pa nga isa pa gid ka tigulang sa nasambit man nga balay.
Suno kay Nanay Dolores, nagalantaw sang TV ang iya nga bana kag yara sila sa kusina sang hinali na lamang sila nakabati sang lupok malapit sa ila nga sala.
Sa ila pagtsekyar sa sala, didto kag ila na lamang nakit-an nga naga-ibwal na ang kalayo kag madasig pa nga nagalapta.
Diri kag nagpangayo na lamang sila sang tabang sa ila kasilingan nga amo ang una nagbuligay sa pagpalong sang kalayo.
Gilayon man nga nag-responde ang mga katapo sang Bureau of Fire Protection (BFP) Tapaz Municipal Fire Station apang nadugayan pa antes napalong ang kalayo bangud maligwin ang lugar nga ginahamtangan sang nasambit nga balay.
Suno kay Nanay Dolores, madamo ang nasunog nga kagamitan kag appliances kapareho sang TV, refrigerator, electric fans, kilohan kag iban pa.
Suno naman kay Senior Fire Officer 3 Reynante Labto, Tapaz Municipal Fire Marshall nga padayon pa ang ila imbestigasyon kun ano ang gintunaan sang kalayo.
Ginpahayag pa sini nga kapin sa P100, 000 ang kahalitan nga natuga sang kalayo kun sa diin partially-burned ang nasambit nga balay.
