ROXAS CITY – Ginakabig nga drug den ang puluy-an nga ginbuy-bust sang otoridad nga ginapanag-iyahan sang mag-utod Arcangeles sa Barangay Tanque, Roxas City.
Sa interview sang Bombo Radyo kay IA 1 Gelly Robins Cataluña, Provincial Officer sang PDEA Capiz, 1 ka bulan na ang pagmonitor sa main target sang operasyon nga si Wally Benliro Arcangeles apang wala nila gin-ekspektar nga madakpan ang lima pa ilabi na si John Lester Acepcion nga isa ka high value target bangud ini ang courier sang ginaalegar shabu.
Suno diri, madamo ang nagareklamo sa nagaguha sulod sa ila barangay ilabi na sa puluy-an sang Arcangeles nga masami ginabisitihan sang mga estranghero kag kun sa diin nakita ang mga sunog nga foil sa likod sang puluy-an agud matago ang ebidensya.
Ginabulubanta 20 grams ang nakuha nga iligal nga droga kag nagabalor sang P140,000 ang kabilugan nga market value kun sa diin yara sa P7,000 ang presyo sang kada gramo sang shabu.
Kalakip sa nadakpan si Wynel Benlero Arcangeles, utod sang main target, Wyndel Albason Arcangeles, pakaisa sang main target nga ginpahayag nagabulig operate sang iligal nga droga, Rone Ubag baral kag Korina Bertolo Manric nga mga bisita sa nasambit nga puluy-an kag nadakpan nga nagagamit sang droga sa sulod sang kwarto.
Magapadayon naman suno diri ang imbestigasyon kay Acepcion nga anay preso sa nasambit nga kaso kag kun diin ini nagakuha sang iligal nga droga.
Dugang diri, ang nasambit nga operasyon ang bunga sang programa nga “Barangay Drug Clearing” (BDC) kun sa diin daku ang nabulig sang nasambit nga Barangay sa operasyon.
Panugyan ni Cataluña sa kabarangayan nga padayon nga magpartisipar sa ila agud matapna kag madula na ang nagagamit kag nagabaligya sang iligal nga droga.
