ROXAS CITY – Ginhabuyan sang granada kag ginpaulanan sang bala ang balay sang senior citizen sa Sitio RMB, Barangay Agsirab Dumarao Capiz, takna alas 9:00 sang gab-I, Agosto 20.
Ginkilala ang tag-iya sang balay kay Medelina Arevalo Porcal, 64-anyos residente sang nasambit nga lugar.
Samtang ang ginatudlo nga suspek ang duha ka menor de edad nga lalaki nga nagapang-edaron sang 15-anyos kag 17-anyos lunsay mga residente sang Poblacion Ilaya sa nasambit nga banwa.
Sandig sa imbestigasyon sang Dumarao MPS, matulog na kuntani si Porcal sang nakabati ini sang lupok sa guwa sang iya balay kag gintan-aw ini sa bintana.
Nakit-an sini ang duha ka menor de edad nga nagapanglakaton sa guwa sang kudal padulong sa nalikod nga bahin sang iya puluy-an.
Makaligad ang pila ka minutos, ginpaulanan sang bala sang mga suspek ang nasambit nga balay kag gilayon nga nagpalagyo sa wala mahibaluan nga direksyon.
Narekober sa ginluntaran sang insidente ang 3 tanan ka mga bala sang 12 gauge shotgun duha ang napalupok, isa ang wala, 6 ka baseyo sang cal. 45 pistol, mga bala sang nasambit nga armas-luthang kag naglalapta nga parte sang granada nga naglupok
Nagaguwa sa imbestigasyon sang mga kapulisan nga daan nga hiligut-anon ang motibo sang mga suspek.
Sa karon, nagapadayon ang hot pursuit operation sang Dumarao MPS samtang nagapadayon ang imbestigasyon angut sa insidente.
