-- ADVERTISEMENT --

ROXAS CITY-Ginkompirmar sang Barangay Kagawad sang Barangay Culasi Roxas City nga bana sang anay konselaha ang isa sa 13 ka mga panibag-o nga kaso sang COVID-19 sa siyudad nga ginbawian sang kabuhi samtang ginabulong sa Roxas Memorial Provincial Hospital.

Sa interview sang Bombo Radyo kay Barangay Kagawad Enrico Joseph ginpahayag sini nga isa ka negosyante kag bana ni Former City Councilor Jenniffer Poliran Anisco ang napatay nga COVID-19 sa nasambit nga barangay.

Suno sa kagawad nga wala sila sang ihibalo kun san-o nga adlaw gindala sa ospital ang nasambit nga persona, bangod wala man naka abiso sa ila ang mga himata sang napatay.

Apang sa iya pagpangusisa, maga-apat na ka adlaw nga na-confine sa ospital antes napatay ang pasyente.

Ginkompirmar man ni Joseph nga may yara na sang madugay nga ginasuprer nga Asthma ang nasambit nga indibidwal nga ginapahayag naga-isahanon na gid lamang sa ila nga puluy-an.

-- ADVERTISEMENT --

Kumpiyansa ang mga barangay officials nga wala man nakaguwa sa nasambit nga barangay ang napatay bangod masami nga yara gid lamang ini nagapadalulong sa ila nga tindahan kag nagapati ini nga sa Barangay Culasi man mismo sini nakuha ang virus.