ROXAS CITY – Ipaidalum sa autopsy ang bangkay sang 42-anyos nga anay miyembro sang Revolutionary Proletarian Army Alex Boncayao Brigade (RPA ABB) agud matul-id kun may foulplay ang kamatayon sini.
Nahibaluan nga nasapwan nga nagabitay na sa kahoy nga Katsilay sa Kalikasan Base, 3rd Infantry Diviasion, Philippine Army sa banwa sang Jamindan, Capiz ang biktima nga si Gaudioso Batoy sang Sitio Proper, Barangay San Jose, Ibajay, Aklan.
Ginpahayag ni Police Executive Master Sergeant Edgar Alantuson nga nakumbinse ang biktima sang militar sa Aklan nga magsungka sa diin gilayon ini nga gindala sa 3rd ID Philippine Army sa banwa sang Jamindan kag nagpaidalum sa duha ka bulan nga training para mangin kabahin sang Special Civilian Active Auxiliary.
Antes ang insedente naglisensiya si Batoy nga magapauli sa ila sa Aklan agud magpabulong sa ginasuprer nga sakit.
Apang ginkakibot sang mga kaupdanan sini sang nakita na lamang ini nga nagabitay sa kahoy sa nalikod nga bahin sang ila barracks.
Nahibaluan nga naconfine sa Camp Peralta Medical center sa Jamindan ang biktima sang nagligad nga semana, bangud nagsuprer ini sang pagpalanakit sang likod.
