BARANGAY, LANOT, ROXAS, CITY – Ginpaidalom sa autopsy ang bankay sang mag-iloy nga nasapwan nga wala na sang kabuhi sa sulod mismo sang ila nga puluy-an sa Sitio Riles, Barangay Lanot, Roxas City.
Madumduman nga ginkilala ang mga biktima nga sanday Elma Perla 72-anyos kag ang anak sini nga si Ruby Jean Perla, 35-anyos nga nagatrabaho bilang virtual assistant.
Suno kay Police Captain Merry Chris Dela Cruz, Police Information Officer sang Capiz Police Provincial Office, ginpahayag nga ginpaidalum sa autopsy ang bangkay sang mag-iloy agud nga matumod ang matuod nga rason sang kamatayon sini.
Dugang pa sini, nga wala naman suno sang nakita nga anggulo nga kaangay ginkawatan ini antes nga ginpatay, bangud nga kumpleto naman suno ang mga kagamitan sang amu nga puluy-an lag mismo mga jewelries nga sul-ot sang mga biktima ang yara pa sa ila sini nga lawas.
Nahibaluan nga may tubo nga bakal nga natukiban ang mga kapulisan nga kun sa diin may bahid pa sang dugo nga nakatago sa lababo kag ginapahayag nga posible amu ang gingamit sa paglampos sang ulo sa mga biktima kag dalayon nga ginbawian sang kabuhi.
Samtang, indi pa naman sa karon makompirmar kun may kaangtanan ang amu nga tubo apang, nagapadayon sa gihapon ang maid-id nga imbestigasyon sang mga otoridad angut sa nasambit nga insidente.
