Narekober sang 12th Infantry Battalion Philippine Army ang bangkay sang isa ka miyembro sang New People’s Army sa Sitio Bidang, Barangay Siya, Tapaz, Capiz.
Ini matapos ginkumpirmar ni COL ERWIN ROMMEL P LAMZON MNSA PA, Chief, 3rd Division Public Affairs Office sang napakig angutan sang Bombo Radyo.
Ginkilala ang nasapwan nga rebelde kay Gino Giganto ukon alyas “Luyong”, residente sang Barangay Lahug, Tapaz kag miyembro sang Squad 2 sang Central Front Komiteng Rehiyon-Panay.
Suno sa pahayag ni Col. Lamzon, ginkilala si Giganto sa pagkumpirmar sang iya mga anay kaupdanan nga rebelde.
Dugang pa sini, nga ginpa-athag man sang iya nga mga kaupdanan nga si alyas “Luyong” ginbawian sang kabuhi bangud sa iya sini ginasuprehir nga balatian nga wala madapatan sang nagakaigo nga pagbulong kag bangud sa madugay nga pagtinir sini sa kabukiran kag ginpahayag nga ini ang gincardiac arrest.
Nagapakig-buylog naman sang pagpangasubo ang pamunuan sang 3rd Infantry Division sa himata ni Giganto.
Suno pa kay COL Erwin Rommel P Lamzon, ginkasubo nila ang pag-abandona sang NPA sa lawas ni Giganto nga gintawag sini “inhumane treatment”.
Mensahe ni Col. Lamzon sa nabilin nga rebelde nga magsungka na kag magbalik sa ila pamilya nga matuod-tuod nga magasuporta kag magapalangga sa ila.
Ini isa ka opportunidad nga magpangabuhi sang malinong, matawhay kag malayo sa pagpakig-away.
Ang Enhanced-Comprehensive Local Integration Program (E-CLIP) makabulig sa ila agud makaumpisa sang panibag-o kag produktibo nga pangabuhi.
