Temporaryo nga gindumilian sang Department of Agriculture (DA) ang importasyon sang domestic kag wild birds, kag poultry products nagikan sa South Dakota sa Estados Unidos matapos ang paglapta sang highly pathogenic avian influenza ukon ang balatian sang mga ini nga bird flu.
Kalakip sa temporary ban nga ginmandu ni Agriculture Secretary Francisco Tiu Laurel Jr. sa bisa sang Memorandum Order No. 04 nga gin-isyu sini amo ang domestic kag wild nga mga ibon, lakip ang mga itlog kag semilya sang mga ini para sa artificial insemination, day-old nga mga sisiw kag iban nga poultry products.
Ang lokal nga poultry industry ang multi-bilyon piso nga negosyo nga nagaganyat sang dalagkuan nga pamuhunan, nagahatag sang palangitan-an kag nakabulig agud masiguro ang seguridad sa pagkaon.
Ginkumpirmar sang mga awtoridad sa Estados Unidos ang mga report sang pila ka paglapta sang H5N1 avian influenza sa South Dakota nga nakaapekto sa mga alaga nga ibon sang mga ini. Ang presensiya sang bird flu virus ang ginkumpirmar sang National Veterinary Services Laboratories sa Ames, Iowa. Kinahanglan nga magpatuman sang ban agud mapunggan kag makontrol ang madasig nga paglapta sang virus sa lugar.
Sandig na man sa Memorandum Order No. 04, ginmanduan sang tiglikom ang Bureau of Animal Industry (BAI) nga suspendihon ang pagproseso kag pag-isyu sang sanitary kag phytosanitary import clearances sa importasyon sang domestic kag wild birds nagikan sa South Dakota.
Ginmanduan man sang tiglikom ang tanan nga veterinary quarantine officers kag inspectors sa bilog nga pungsod nga kumpiskahon ang mga kalakal nga gin-import nagikan sa South Dakota, maluwas sa mga yara sa biyahe na ukon naka-abot na sa mga lokal nga pantalan matapos maipaguha ang kautusan. Para naman sa poultry products, dapat ginkatay antes sang Nobyembre 13, 2024. Ang mga heat-treated nga mga produkto naman, exempted sa import ban.
