ROXAS CITY – Nakapagkit sang 27 ka mga kaso sang balatian nga dengue ang banwa sang Jamindan partikular sa Barangay Pangabuan kun sa diin ginkonsiderar ini sang DOH Capiz nga pangaduha sa bug-os nga probinsya sang Capiz.
Ini ang suno kay Kapitan Neil Valad-on, Punong Barangay sang Barangay Pangabuan sang mainterview sang Bombo Radyo.
Ginsiling sini nga ang kadam-an sa nabalhag nga kaso sang dengue ang yara sa National Housing Authority (NHA) nga nahamtang sa Sitio Bangon sa nasambit nga barangay.
Ginalantaw sini nga rason ang drainage nga yara sa NHA kun sa diin mabudlay sudlon bangud tuman kadalom, apang sa karon ginbutangan na nila ini sang chemical powder agud madula ang mga lamok.
Samtang suno kay Kapitan, nagsugod na sila kaupod ang iya opisyales sa barangay, ang munisipyo sang Jamindan kalakip ang DOH Jamindan sa pagpanglimpyo sa palibot ilabi na sa bahin kun sa diin masami ginaistaran sang mga lamok, kag nagpatigayon man sila sang inspeksyon sa tagsa ka puluy-an.
Pahayag sini nga adlaw-adlaw na ang pagpatigayon sang pagpanglimpyo kag wala nagakulang ang ila barangay sa pagpahanumdom sa pumuluyo nga magpanglimyo bangud subong lang nabalhag ang nasambit nga balatian sa ila barangay sumugod sang ginpahamtang ang NHA.
Nagaplano man ang punong barangay nga ipalab-ot ini sa ahensya sang NHA agud mahatagan nila sang aksyon.
Ginahinyo ni Kapitan Valad-on sa pumuluyo, kun mahimo sundon ang ginatudlo sang DOH Capiz nga mga solusyon agud matapna kag gilayon madula ang dengue ilabi na sa housing.
