PRESIDENT ROXAS, CAPIZ – Naka-red alert status na ang banwa sang President Roxas, Capiz bangud sa Bagyo Uwan.
Sa interview sang Bombo Radyo kay Mayor Receliste Escolin, iya ginpahayag nga nagpagwa ang iya talatapan sang Executive Order sandig man sa mandu sang Regional Disaster Risk Reduction and Management Council .
Suno kay Mayor Escolin, magapatigayon sila sang pagsinapol kaupod ang nagkalain-lain nga ahensya sang banwa agud nga istoryahan ang mga pre-emptive measures nga pagahimuon.
Pahayag pa niya, padayon ang monitoring sang talatapan kag ginasiguro nga handa man ang mga emergency response team nga maga rescue sa tion nga magtaas ang lebel sang tubig ilabi na sa mga low land barangay kag mga flood prone area.
Handa naman ang mga evacuation centers sang tagsa ka mga barangay kag ang prepositioned food packs nga igapanagtag sa mga maga-evacuate.
Nagapanawagan man ang natungdan sa mga pumuluyo sang President Roxas nga mangin aligmat kag alerto kag gilayon nga mag-evacuate agud nga malikawan ang anuman nga sahi sang insidente.
Interviewed by: Bombo Francis Biñas via Zona Libre
