ROXAS CITY – Gin-athag sang Barangay Kagawad sang Barangay Inzo, Roxas City ang isyu sang listahanay sang ayuda sa ila barangay.
Sa interview sang Bombo Radyo kay Barangay Kagawad Teodoro Arcega Jr., iya ginpahayag nga ang 30 nga nalista ang una pa lamang nga batch nga nahatagan sang ayuda.
Suno kay Arcega,may yara sang 617 tanan ka mga evacuees kag apektado sang bagyo ang pagahatagan sa masunod nga hugna sang ayuda.
Pahayag pa niya, nalakip ang mga barangay officials sa listahan sang first batch sang ayuda bangud sila ang nagbulig kag nagsapupo sa mga evacuees gani nagakadapat lang nga mahatagan man sila.
Gin-athag pa niya nga wala sang may ginkakas nga pangalan kag indi matuod nga may makabaton sang P10,010 nga ayuda.
Nahibaluan nga naghatag ang DSWD Regional Office 6 sang duha ka kategorya sang benepisyaryo para sa ayuda.
Ang totally affected amo ang makabaton sang ₱10,000 kung totally damaged ang balay, indi na maistaran, may long-term displacement, may dako nga kapierdihan sa pangabuy-anan nga lapaw sa 50%, ukon may napatay nga miyembro sang pamilya.
Samtang, ang mga partially affected ang makabaton sang ₱5,000 kung partially damaged ang balay, temporaryo lang nga nadisplaced ukon indi maglapaw 3 ka adlaw sa evacuation center, ukon may gamay nga kapierdihan sa pangabuy-anan nga mas manubo sa 50% kag may nasamaran ukon nagmasakit nga miyembro sang pamilya.
Dugang pa sang natungdan, mga pagpatalang ang mga post sa social media nga rason sang kinagamo bangud naka-base sa assessment sang Department of Social Welfare and Development (DSWD) ang desisyon kun bala mahatagan sang ayuda ukon indi.
Interviewed by: Bombo Sunnie Mae Batencila via Zona Libre
