ROXAS CITY, CAPIZ – Handa na ang Baranagay Officials sang Barangay Cagay, Roxas City sa posible nga pagdugok sang tawo sa Cagay Public Cemetery kadungan sang pagdumdom sang tigkalalag.
Sa interview sang Bombo Radyo kay Barangay Kagawad Isidro Aragon, iya ginpahayag nga nagpatigayon na ang ila Barangay Council sang pagsinapol agud nga mas mapaghandaan ang nasambit nga pagsaulog.
Suno kay Aragon, nakadeploy na ang mga barangay tanod agud nga magbulig assist sa mga tawo sa patyo kag sa lakat sang trapiko sa guwa sini.
Pahayag pa niya, ginabawal na ang pagsulod sang salakyan sa nasambit nga patyo kag magadesigner na sang lugar nga mahimo lamang parkingan agud nga malikawan ang traffic.
Samtang, yara man ang mga katapo sang kapulisan kag bumbero agud nga magbulig sang bantay agud nga mapabilin ang kalinong kag katawhay.
Nagapanawagan man ang natungdan nga indi na magdala sang mga ginabawal nga butang kasubong sang kutsilyo subong man ang makahulubog nga ilimnon kag bantayan sang maayo ang mga kabataan agud malikawan ang mga insidente.
Interviewed by: Bombo Francis Biñas via Zona Libre
