Nag-angkon sang gamay nga damage ang barko sang Bureau of Fisheries and Aquatic Resources nga nagapatigayon sang routine maritime patrol malapit sa Pag-asa Island matapos dutdutan kag ginbungguan sang Chinese maritime militia (CMM) vessel.
Ginkumpirmar ini sang Bureau of Fisheries and Aquatic Resources sang Martes, Oktubre 15.
Natabo ang nasambit nga panibag-o nga engkwentro sa West Philippine Sea samtang nagapalapit ang BRP Datu Cabaylo sa Pag-asa Cay 4, nga makit-an 5 nautical miles lamang gikan sa Pag-asa Island, alas 7:45 sang aga sadtong Biyernes, Oktubre 11.
Suno sa BFAR, nagpatigayon sang delikado nga maniubra ang barko sang CMM kag gintuyo nga balabagan ang ginaagyan sang patrol boat sang Pilipinas nga nagresulta sa pagbunggo sa starboard bow sang BRP Datu Cabaylo.
Nagresulta ini sang pagkagupi sang starboard bow sang BFAR vessel apang napadayon sa gihapon sini kaupod ang BRP Datu Sanday ang ila nga misyon kag luwas nga nakadungka sa Pag-asa Sheltered Port.
Sa pihak naman sang panibag-o nga pangpang-harass sang Chinese vessel, nanindugan ang BFAR nga padayunon ang ila nga pagpatrolya sa WPS.
Gindayaw man sang ahensiya ang kapag-on sang mga crew sang BRP Datu Cabaylo sa panindugan sa territorial rights sang Pilipinas sa tunga sang nagalala nga komprontasyon sa WPS.
Matandaan nga ang pareho man nga mga barko sang BFAR ang ginbombahan sang tubig sang Chinese Coast Guard vessels sadtong Oktubre 8 malapit sa Scarborough shoal sa WPS sa pagtuyo nga balabagan ang mga barko sang Pilipinas gikan sa pagdul-ong sang mga suplay para sa mga Pilipino nga manugpangisda nga yara sa nasambit nga kadagatan.
