Isa ka barko sang China Coast Guard (CCG) ang nagpalupok sang water cannon kag nagbunggo sa barko sang Bureau of Fisheries and Aquatic Resources (BFAR) malapit sa Pag-asa Cay 2 ukon Sandy Cay sa West Philippine Sea kahapon nga adlaw, Miyerkules, Mayo 21.
Sa isa ka pahayag, ginkumpirmar sang BFAR nga nagapatigayon sang routine mission ang duha sini ka barko nga BRP Datu Sanday kag BRP Datu Pagbuaya kaupod ang scientific team agud magkuha sang sand samples sa lugar bilang kabahin sang maritime scientific research initiative sang natabo ang panibag-o nga harassment sang Chinese vessel.
Suno sa ahensya, makaduha ka beses nga nagpalupok sang water cannon ang CCG vessel 21559 kag nagbunggo sa BRP Datu Sanday nga nagresulta sang madamo nga kahalitan sa port bow kag smokestack sang barko sang Pilipinas nga nagbutang sa peligro sang kabuhi sang mga sibilyan nga pasahero.
Ginpahayag sang BFAR nga ini ang labing una nga kahigayunan nga naggamit sang water cannon ang Chinese vessel batuk sa research vessel sang BFAR sa Pag-asa Cays.
Sa pihak sang agresibo, delikado kag iligal nga aksyon sang barko sang China, natapos sang Philippine scientific team ang ila misyon sa Pag-asa Cays 1, 2 kag 3.
