ROXAS CITY – Patay na sang nasapwan ang 4-katuig nga babayi matapos ginaalegar nalumos sa sapa-sapa sa Sitio Agbatang, Barangay Cudian, Ivisan.
Sa interview sang Bombo Radyo kay Barangay Kagawad Jonathan Arabia, takna 4:00 sang hapon, Disyembre 1 nagpadulong sa barangay kag nagreport ang mga ginikanan sang biktima nga nadula ang ila bata.
Ginapahayag natulugan ang ginikanan sang biktima kag wala natalupangdan nga nakaguwa ang bata sa ila puluy-an.
Gilayon naman nagpatigayon sang search operation ang council kaupod ang mga katapo sang Ivisan Municipal Police Station, may pipila ang nagsalom sa sapa-sapa bangud sa pagpati nga posible nahulog ukon nalumos ang bata apang napaslawan sila nga makit-an ang biktima.
Tubtob nalab-ot sang mga nagapangita ang sapa-sapa ginabulubanta 80 metros ang kalayuon sa puluy-an sang biktima, diri na nasapwan nga wala na sang kabuhi ang biktima nga naga-utaw-utaw.
Mahibaluan, naga-isahanon nga anak ang biktima kag ginaalegar may kondisyon nga autism.
