ROXAS CITY – Nakaresponde sa 30 ka firecalls ang Bureau of Fire Protection (BFP) sa bug-os nga probinsya sang Capiz sa sulod sang first semester sang tuig 2022 kun sa diin ginabulubanta nga may kabug-usan nga kahalitan sang mas o menus P400,000.
Ini ang ginpahayag ni F/CInsp Jenny Mae Masip, Provincial Director sang BFP-Capiz sang mainterview sang Bombo Radyo.
Suno diri sa 17 ka mga kabanwahanan, 16 na ang may yara sang kaugalingon nga station samtang padayon pa ang pag-construct sa fire station sang banwa sang Sapian.
Sa bug-os nga probinsya, may yara sang 25 ka mga firetrucks ang BFP kun sa diin 3 diri ang unserviceable sa banwa sang Mambusao, Sigma kag Pontevedra.
Suno kay Masip, magadugay pa sang 2-3 ka bulan ang pagkay-o sa firetruck sang Mambusao kag Sigma bangud yara ini sa general repair samtang may yara naman sang depekto ang pumpbelt kag madamo sang damage ang salakyan sang Pontevedra.
Dugang pa sang opisyal, nga nahibaluan na sang mga stations nga wala sang firetruck ang tatlo ka mga banwa kag handa ang mga kaiping nga stations sa pagresponde sang sunog.
